ایران نے پاکستان اور افغان سرحد پر حفاظتی انتظامات مزید سخت‘ سرحد پر خفیہ کیمرے نصب۔پاکستان کے ساتھ طویل سرحد کے ساتھ دیوار کی تعمیر بھی شروع کر دی گئی۔ سرحدی آبادی کو سخت مشکلات کا سامنا:
تہران/چاغی(اردوپوائنٹ تازہ ترین اخبار01 مارچ2007)ایران نے ممکنہ امریکی حملے کے پیش نظر پاکستان اور افغانستان سے ملحقہ سرحدوں پر سیکورٹی کے انتظامات انتہائی سخت کردیئے ہیں ‘سرحد پر ایرانی فورسز کے گشت میں اضافہ‘ 17دن گزر جانے کے باوجود بھی زیرو پوائنٹ نہیں کھولا گیا مقامی آبادی میں اشیاء خوردونوش کی قلت پیدا ہوگئی ۔تفصیلات کے مطابق گزشتہ ہفتے زاہدان میں بم دھماکے اور گزشتہ روز سرحدی علاقے کے قریب واقع ایرانی حدود میں 2ایرانی اہلکاروں کی ہلاکت اور 4 اہلکاروں کو اغواء کئے جانے کے واقعے کے بعد ایرانی حکومت نے پاکستان کے ساتھ ملحقہ اپنی سرحد پر مزید سخت اقدامات کر دئیے ہیں اور فورسز کی تعداد میں بھی غیر معمولی اضافہ کردیا گیا ہے اور پاکستان کے ساتھ ملحقہ سرحد سمیت اپنی تمام سرحدوں پر خفیہ آلات بھی نصب کر دیئے ہیں اورویزہ کے حامل افراد کو بھی کئی گھنٹوں کی سخت چیکنگ کے بعد ایران میں داخلے کی اجازت دی جا رہی ہے ۔ایرانی حکام کاکہنا ہے کہ افغان سرحدی حدود سے امریکی جاسوس ایران میں داخل ہوسکتے ہیں۔جبکہ دوسری جانب ایران حکومت کی جانب سے پاک ایران سرحدپر سات سو کلومیٹر طویل تین فٹ چوڑی اور دس فٹ اونچی دیوار کی تعمیر کا م بھی شروع کر دیا گیاہے دیوار کے اندر مضبوط سریے کا استعمال کیا جا رہا ہے ۔ واضح رہے کہ 1992ء میں ایران اور پاکستان کی حکومتوں کے درمیان دونوں اطراف کے سرحد پر واقع شہروں کے لوگوں کے لئے راہداری اور اشیاء خورونوش کی نقل و حرکت کی اجازت دی گئی تھی تاہم ایران میں گزشتہ دنوں کے واقعات کے بعد ایران کی جانب سے مقامی آبادی کے لئے زیرو پوائنٹ کو سیل کر دیا گیا تفتان شہر سے ملحقہ زیرو پوائنٹ گزشتہ سترہ دن سے بند ہے اورتاحال نہیں کھولا گیا جس سے ایران کے سرحدی علاقوں میں جانے والا لاکھوں روپے کا فروٹ ‘آلو اور چاول پاکستانی سرحدی علاقے تفتان میں پڑا پڑا خراب ہو رہا ہے جس کے باعث مقامی تاجر برادری کو روزانہ لاکھوں روپے کا نقصان ہورہا ہے ہزارں بے روزگار مزدور مایوس ہو گئے ہیں اور مقامی آبادی کے لئے اشیاء خورد ونوش کی قلت پیدا ہو گئی ہے۔اسکریپ کا کاروبار کرنے والے تاجروں کے اربوں روپے ڈوبنے کا خدشہ ہے کیونکہ اسکریپ دوسرے ممالک سے ایران کے راستے پاکستان پہنچتے ہیں گزشتہ دو ہفتوں سے اسکریپ کا کاروبار مکمل طور پر بند ہے تاجروں کے اربوں روپے ایران میں اور پاکستان میں ڈوب جائیں گے ۔ایرانی اشیاء خوردونش کی کمی کی وجہ سے دکاندانوں کی چاندی ہوگئی ایرانی سامان کی مہنگے داموں فروخت شروع کردی گئی ۔ انہوں نے کہا کہ اگر مزید زیرو پوائنٹ کی بندش کا سلسلہ جاری رہا تو تاجر برادری کوروزانہ دس سے پندرہ لاکھ روپے کا نقصان اٹھانا پڑے گا۔